Ævintýri á aðventunni Tónlistarleikhús

Ævintýri á aðventunni

Jólin eru að koma og systurnar Solla og Gunna eru að springa af spenningi. Það er allt svo skemmtilegt og skrítið: Jólalykt, jólalög, jólagjafir – og ekki má gleyma skónum sem fer út í glugga. Solla er reyndar ekkert glöð þegar hún fær vettlinga í skóinn.

„Ég vil enga mjúka pakka
og neita fyrir þá að þakka.“

Gunna segir henni að það sé best að vara sig á heimtufrekju og auðvitað er það rétt hjá henni, því bæði Grýla og Jólakötturinn eru sammála um að það sé gott að börn séu óþekk.

„Mér líst vissulega vel á þau flest,
en verstu börnin bragðast samt best.“

Þegar systurnar fara í bæjarferð til að kaupa gjafir komast þær í hann krappan þegar þær rekast bæði á jólasvein og sjálfan köttinn. Þá kemur sér vel að kunna allar jólareglur og jólalög sem gilda á aðventunni.

Ævintýri á aðventunni er nýr gleðilegur jólasöngleikur úr smiðju sviðslistahópsins Hnoðra í norðri sem sniðinn er að börnum á 6-10 ára aldri, en ætti að koma öllum aldurshópum í jólaskap. Lengd verksins er  30 mín.

Í sýningunni skarast skáldskapur, ópera, söngleikur og gamanleikhús á stórskemmtilegan hátt. Höfundur og tónskáld er Þórunn Guðmundsdóttir, en aðalsmerki hennar eru frábærlega fyndnir og hnittnir textar með orðaleikjum auk þess sem tónlist hennar er mjög aðgengileg og yndisleg áheyrnar.

Verkið er stutt og laggott, eða um 30 mín að lengd, fyndið og efniviður sóttur í hinn undarlega íslenska jólasöguarf.

Til að gera sýninguna meðfærilegri og auðveldari í uppsetningu er ekki unnið með leikmynd eða ljós og því auðvelt er að aðlaga sýninguna að því rými sem fyrir hendi er á hverjum stað. Búningar Rósu Ásgeirsdóttur skipta aftur á móti miklu máli og eru mikið fyrir augað. Flytjendur eru Jón Þorsteinn Reynisson harmonikkuleikari og söngkonurnar Björk Níelsdóttir og Erla Dóra Vogler. En þau verða allt í senn leikmynd, leikarar og tónlistarflytjendur í verkinu sem leikstýrt er snilldarlega af Jennýju Láru Arnórsdóttur.

Gleðileg jól!

Verkefnið er styrkt af Tónskáldasjóði, Tónlistarsjóði, Uppbyggingarsjóði SSNE, Menningarsjóði Akureyrar og Samfélagssjóði Norðurorku.

 

 

Upplýsingar
Hvað

Tónlistarleikhús

Hvenær

Nóvember 2022

Hvar

Norðurland

Hverjir

Sviðslistahópurinn Hnoðri í norðri

Aldurshópur

1. - 4. bekkur

Aðstaða og tækni

Engar tækniþarfir en gólfpláss fyrir leikara/söngvara.