Svakalegar sögur! Bókmenntir

Svakalegar sögur!

Svakalegar sögur er 60 mín kynning og smiðja fyrir krakka um hvernig allir geta fengið hugmyndir og búið til sögur – og hvers vegna það er svakalega mikilvægt að æfa ímyndunaraflið. Smiðjan hentar krökkum í 3.-6. bekk.
(Smiðjan getur líka gengið fyrir yngsta og elsta stig í grunnskóla, t.d. í minni skólum)

Eva Rún Þorgeirsdóttir, rithöfundur, og Blær Guðmundsdóttir, teiknari, hafa báðar starfað við fjölbreytt verkefni tengd bókaútgáfu og barnamenningu og hafa síðastliðin tvö ár kennt rit- og teiknismiðjuna Svakalega sögusmiðjan í Borgarbókasafninu.

Í fyrirlestrinum Svakalegar sögur segja þær frá:

  • hvernig krakkar geta hugsað skapandi og skrifað svakalegar sögur.
  • af hverju það er mikilvægt að hugsa skapandi og lesa bækur.
  • hvernig hægt er að æfa sig í að fá hugmyndir hvar og hvenær sem er.
  • hvernig krakkar geta sent sínar eigin sögur inn í verkefnið Sögur.

Og síðan segja þær frá og sýna verk í vinnslu. Í smiðjunni búa þær til sögupersónu og sögu með aðstoð krakkanna í salnum (mjög skemmtilegt!).

Eva Rún Þorgeirsdóttir er rithöfundur og skrifar bækur og handrit að sjónvarpsefni fyrir krakka. Hún hefur m.a. skrifað bækurnar um jólasveininn Stúf, fantasíurnar Skrímslin vakna og Hættuferð í Huldubyggð og einnig hljóðbókina Sögur fyrir svefninn á Storytel, sem hlaut Íslensku hljóðbókaverðlaunin 2022.
Eva Rún hefur einnig unnið sem handritshöfundur, framleiðandi og leikstjóri sjónvarpsþátta fyrir KrakkaRÚV. Eva Rún stýrði framleiðslu á Stundinni okkar í tvo vetur og vann Edduna 2021 fyrir besta Barna- og unglingaefni ársins.

 

Blær Guðmundsdóttir er teiknari, barnabókahöfundur og grafískur hönnuður. Hún hefur myndlýst barna- og skólabækur þ.á.m. bækurnar um Stúf, Holupotvoríur, Ég og sjálfsmyndin og Orð eru ævintýri. Árið 2019 sendi hún frá sér sína fyrstu frumsömdu bók, Sipp, Sippsippanipp og Sippsippanippsippsúrumsipp – systurnar sem ætluðu sko ekki að giftast prinsum.
Blær vann FÍT-verðlaunin 2020 fyrir þessa frumraun sína og hlaut einnig tilnefningu til Barnabókaverðlauna Reykjavíkurborgar í flokki myndlýstra bóka.

Blær og Eva Rún hafa stýrt Meistarabúðum Sagna 2022- 2024 fyrir 10-12 ára krakka sem komust áfram í keppninni Sögur verðlaunahátíð barnanna. Eva Rún og Blær fengu Vorvindaviðurkenningu IBBY á Íslandi 2023, fyrir framlag sitt til barnamenningar með Svakalegu sögusmiðjunni. Svakalega sögusmiðjan hefur hlotið styrki frá Barnamenningarsjóði og Bókasafnasjóði.

 

Upplýsingar
Hvað

Listasmiðja

Hvenær

Haust 2024

Hvar

Austurland

Hverjir

Eva Rún Þorgeirsdóttir
Blær Guðmundsdóttir

Aldurshópur

3. - 6. bekkur

Aðstaða og tækni