Skeyti til náttúrunnar Myndlist

Skeyti til náttúrunnar

Skeyti til náttúrunnar er listfræðsluverkefni sem byggir á Morse-kóða kerfinu og táknfræði tíbetsku bænafánanna og í kjölfarið munu nemendur búa til þeirra eigið táknkerfi til að skapa samtal við náttúruna út frá náttúruverndarsjónarmiðum. Verkefnið er þróað af myndlistarmanninum Önnu Júlíu Friðbjörnsdóttur í tengslum við sýningu sem hún og myndlistarmaðurinn Karlotta Blöndal munu opna í sýningarsal Skaftfells í september n.k. Þær eiga það sameiginlegt að vinna báðar með samband manns og náttúru og munu, fyrir sýninguna, vinna verk í tengslum við staðbundin menningarsöguleg viðfangsefni. Nemendur munu fá innsýn inn í gamla Morse-kóða samskiptaformið og í kjölfarið verður einnig kynnt fyrir þeim tíbetsku bænafánarnir sem eru notaðir til að blessa náttúru í nærumhverfi og eru þar með hluti af tilraun mannsins til að tala við náttúruna. Táknfræði bænafánanna er bundið við ákveðið litakerfi sem tengist öflum jarðar og á þá eru prentaðar bænir. Nemendur munu styðjast við kerfi Morse-kóðans og bænafánanna til að búa til sína eigin fána og koma áleiðis sínum skilaboðum til náttúrunnar.  Öllum grunnskólanemendum á miðstigi á Austurlandi verður boðin þátttaka og er áætlað að um 300 börn taki þátt í verkefninu þeim að kostnaðarlausu. Verkefnið er svokallað farandverkefni og munu leiðbeinendurnir Anna Margrét Ólafsdóttir og Signý Jónsdóttir heimsækja alla grunnskóla á Austurlandi auk grunnskólana í Raufarhöfn, á Þórshöfn og í Öxarfirði. Verkefnið er hluti af BRAS.

Frekari upplýsingar um fræðslustarfsemi Skaftfells:
https://skaftfell.is/fraedhsla/thjonusta/
https://skaftfell.is/fraedsluverkefni-fyrir-grunnskola/

Anna Júlía Friðbjörnsdóttir þróar verkefnið í tengslum við sýningu sína í Skaftfelli sem fyrirhugað er að opni 25. september á þessu ári. Anna Júlía (f. 1973) er myndlistarmaður starfandi í Reykjavík. Hún vinnur þvert á miðla og skoðar mengið á milli vísinda og menningar í verkum sem taka mið af samtíma og sögulegum málefnum. Hún lauk mastersgráðu frá Manchester School of Arts, Manchester Metropolitan University, 2004 og BA Fine Art (Hons) gráðu frá London Guildhall University 1998. Áður stundaði hún nám við Myndlista og handíðaskóla Íslands 1993–95. Anna Júlía starfaði sem verkefna– og sýningarstjóri í i8 gallerí 2008–2015 og var meðstofnandi og ritstjóri myndlistartímaritsins Sjónauka sem var gefið út á árunum 2007–2009. Hún hefur tekiðþátt í fjölda samsýninga og haldið fjórar einkasýningar á Íslandi en hún var tilnefnd til Íslensku myndlistarverðlaunanna 2018 fyrir sýninguna Erindi í Hafnarborg. Framundan eru sýningar í Listasafni Reykjavíkur, á Menningarsetrinu á Hrafnseyri og í Skaftfelli, Seyðisfirði.

Leiðbeinandi verkefnisins er Kamilla Gylfadóttir.

Kamilla Gylfadóttir (f. 1989) útskrifaðist með B.A. gráðu í ítölsku og ferðamálafræði árið 2014. Í skiptinámi við Háskólan í Bologna kviknaði áhugi á ljósmyndun og skrifaði hún lokaritgerðina um ljósmyndun og ítalskan Fútúrisma. Hún lærði ljósmyndun í Árósum og kvikmyndagerð í Sarajevo og hefur unnið að kvikmyndagerð og uppsetningu sýninga í Berlín og Marokkó. Árið 2020 lauk hún M.A. námi í kvikmyndavarðvörslu og miðlun við Háskólan í Amsterdam. Þar lagði hún áherslu á að rannsaka skapandi hlutverk safnvarða í sambandi við eðli og möguleika persónulera kvikmynda (e. home movies) innan kvikmyndasafna. Í verkum sínum er kvikmyndamiðillinn sjálfur aðal viðfangsefnið og hvernig hann endurspeglar okkar eigið augnarráð. Á síðasta ári tók hún þátt í verkefni þar sem listamönnum var boðið að vinna skapandi með kvikmyndaefni frá söfnum í Grikklandi og Egyptalandi og var afraksturinn sýndur á kvikmyndahátíðinni Syros International Film Festival í Júlí 2021.

Upplýsingar