BarnaBærinn Listasmiðjur

BarnaBærinn

Hvað ef börnin fengju að ráða? Sviðslista-vinnusmiðja og sýning þar sem krakkar fá rými til að búa til sitt eigið drauma-samfélag.

BarnaBærinn er listavinnusmiðja fyrir krakka á aldrinum 7-12 ára, leidd af sviðslistakonunum Hrefnu Lind og Salvöru Gullbrá. Markmið smiðjunnar er að nota aðferðir sviðslista til að búa saman til heim þar sem krakkar ráða öllu í stað fullorðinna.

Vinnusmiðjan miðar að því að gefa krökkum verkfæri og rými til að búa til sitt eigið drauma-samfélag. Með hópi þeirra krakka sem taka þátt á hverjum stað þróum við hugmyndir þeirra um hvernig bærinn þeirra ætti að vera, og í lok smiðjunnar framkvæmum við hugmyndirnar í formi gjörnings sem tekur á sig ýmsar myndir eftir því hvernig hópurinn er samsettur í hvert sinn, en með það markmið að fá fullorðna inn sem áhorfendur og leika okkur að valdahlutverkunum á milli fullorðinna og barna.  Hugmyndirnar að þessum þátttöku-gjörningum verða þróaðar í algjörri samvinnu við börnin í anda Krakkaveldis, og hafa að markmiði að láta drauma krakkanna rætast. Hvað hefur þau alltaf langað að prófa? Hvernig vilja þau hafa samfélagið í kringum sig? Hvað vilja þau gera við foreldra sína (sem yfirleitt ráða öllu), hvernig vilja þau “breyta” þeim? Og samfélaginu um leið.

Upplýsingar