BIG BANG Tónlist

Nánar um BIG BANG

BIG BANG er ævintýraleg evrópsk tónlistarhátíð fyrir unga áheyrendur sem var stofnuð árið 2010 af sex evrópskum samstarfsaðilum og byggir á arfleifð tónlistarhátíðarinnar OORSMEER sem hafði verið haldin í evrópskum borgum síðan árið 1995. Með stuðningi Evrópusambandsins varð skipulagt samstarf á milli menningarmiðstöðva frá mismunandi svæðum í Evrópu að veruleika og er hátíðin haldin ár hvert í fjölda evrópskra borga. Allir samstarfsaðilar eiga það sameiginlegt að vilja auka aðgengi barna að tónlist. Frumkvæðið að þessu samtali spratt út frá sameiginlegri þörf til að stuðla að auknum listrænum gæðum í annarri tónlist en dægurlagatónlist fyrir evrópsk börn. Árið 2015 hlaut hátíðin hin virtu EFFE verðlaun. Árið 2018 hlaut verkefnið fjögurra ára stuðning í gegnum Creative Europe áætlun Evrópusambandsins og nú í febrúar var hátíðin haldin í fyrsta skipti utan Evrópu, nánar tiltekið í Ottawa, Kanada. Fastir samstarfsaðilar eru BOZAR (Brussel, Belgíu), De Bijloke (Gent, Belgíu), DeSingel International Art Campus (Antwerpen, Belgíu), Centro Cultural de Belém (Lissabon, Portúgal), Instituto de la Cultura y las Artes de Sevilla (Spáni), Culturalnassis (Aþenu, Grikklandi), Opéra de Lille (Frakklandi), Wilminktheater og Muziekcentrum Enschede (Hollandi) og nýir samstarfsaðilar eru The Arch (Dublin, Írlandi), Eesti Kontsert (Tallinn, Eistlandi), Opéra de Rouen Normandí (Frakklandi), MotorMusic (Mechelen, Belgíu) og nú býðst List fyrir alla í samstarfi við Reykjavíkurborg/Barnamenningarhátíð, Tónlistarborgina Reykjavík og Hörpu tónlistar- og ráðstefnuhús að vera með árin 2019-2022. Það er okkur mikill heiður að vera þátttökuaðili ásamt þessum faglegu og reynslumiklu samstarfsaðilum, auk þess sem hverri hátíð fylgir fjármagn, stuðningur, reynsla og þekking frá samstarfsaðilum og Creative Europe.

Verkefnið leggur áherslu á tónlistarfólk og tónskáld sem líta á reynslu sína og tónlistarsköpun sem ævintýri. Verkefnið er ætlað viðburðahöldurum sem vilja takast á við nýjar leiðir til að gera tónleikasókn allra barna að sterkri og ríkri reynslu og til að þeir sem starfa innan menningargeirans leggi áherslu á að ná til nýrra áhorfenda.

Markmið BIG BANG

• Auka gæði, fagmennsku og samtal listamanna og viðburðarhaldara sem koma að tónlistarviðburðum fyrir börn og ungmenni.
• Hvetja til samtals og samstarfs þeirra sem starfa að listum og menningu og þeirra sem semja og flytja tónlist fyrir börn
• Hvetja tónlistarfólk til að semja nýja og fjölbreytta tónlist með börn í forgrunni·
• Auðga og bæta gæði þeirrar tónlistar sem börnum í Evrópu er boðið upp á
• Móta verkefni sem þroska og þróa unga áhorfendur og hvetja börn til að fást við tónlist sem ekki er háð markaðslögmálum
• Stuðla að og hvetja til flæðis tónlistarfólks og verka þeirra á milli landa
• Auka aðgengi barna að fjölbreyttum listviðburðum sem ekki heyra undir hversdags menningu
• Stuðla að þekkingar- og upplýsingamiðlun er varðar tónlistarviðburði- og verkefni fyrir börn
• Þróa verkfærakistu fyrir aðila sem vinna með tónlist og tónlistarviðburði fyrir unga áheyrendur svo þeir geti bætt sína kunnáttu og færniHér má sjá myndskeið frá BIG BANG í Hörpu 2023.