Listrænt ákall til jökla Hönnun

Öll börn Grunnskóla Hornafjarðar taka þátt í skapandi listasmiðju undir leiðsögn Hönnu Dísar Whitehead. Unnið verður með væntumþykju og persónuleg tengsl við Vatnajökul þar sem áhersla verður lögð á gildi fegurðar jökulsins bæði í nálægð og fjarlægð.  Í smiðjunni rannsaka börnin eigin minningar, upplifanir og þekkingu á jöklinum, hvort sem þær spretta úr daglegu umhverfi þeirra, sögum, ferðum eða sjónrænum áhrifum landslagsins.

Börnin kynnast jafnframt rannsóknum Þorvarðar Árnasonar sem starfar við rannsóknarsetur Háskóla Íslands á Höfn. Hann hefur í tvo áratugi rannsakað Vatnajökul með listrænum aðferðum. Þorvarður nýtir kvikmyndir, ljósmyndir og aðra sjónræna miðla til að fanga tíma, breytingar og nærveru jökulsins. Í smiðjunni fá nemendur innsýn í þessi verkefni og læra um þær miklu breytingar sem Vatnajökull hefur gengið í gegnum á undanförnum árum.

Með fjölbreyttum sköpunaraðferðum fá börnin tækifæri til að vinna úr bæði tilfinningum og þekkingu á jöklinum. Þau skoða hvernig list getur vakið spurningar, eflt áhuga og hjálpað okkur að sjá náttúruna á nýjan hátt.

Markmið smiðjunnar

• Að efla áhuga barna á jöklum og náttúrufari svæðisins
• Að styrkja tengsl þeirra við eigin nánasta umhverfi
• Að rækta undrun, virðingu og væntumþykju gagnvart náttúrunni
• Að nýta skapandi aðferðir til að dýpka skilning á breytingum í náttúrunni
• Að kynna sjónræna rannsóknaraðferð og listsköpun sem leið til að takast á við umhverfisbreytingar

Niðurstaðan er lifandi og persónuleg sköpun barna sem endurspeglar samband þeirra við eitt merkasta náttúrufyrirbæri Íslands – Vatnajökul. Niðurstöður verkefnisins verða sýndar í Norrænahúsinu  í Reykjavík vorið 2026 í tengslum við sýningu sem fjallar um Jökla og loftslagsbreytingar.